قصيده كأنك مفيش /// للشاعر احمد فؤاد نجم

كأنك مفيش ..

رائعة جديد للشاعر أحمد فؤاد نجم

برغم إن صورك فـ كل الدواير وكل المداخل وكل المحاور

ومليا الشوارع على كل حيط مطنش علينا وعامل عبيط

كأنك مفيش ..

***

يا فرحة قلوبنا رئيسنا ظريف فُكهي ابن نكته ودمه خفيف

فـ عهدك سيادتك فَرَشنا الرصيف وآخر مُنانا غُموس اورغيف

وكل أمَّا تُخنُق ندوَّر ..

مفيش !!

***

مسيِّب علينا عصابة حبايبك فضايح وسرقة ونهب بسبايبك

مابين حزب نجلك وهانم جلالتك وجيش الغوازي اللي داير يجاملك

وناملك وقاملك .. وحارسك وأمنك شبعنا مهانه .. شبعنا لطيش ..!

وأنت يا ريس كأنك مفيش ..

***
باعونا فـ حضورك ببركة عِبـيدك وغالي وسرورك
باعوا الأراضي وكل المصانع وباعوا البنوك ..
وقدَّام عِنيك صوتنا إتـنبح ننادي.. يا ريس ده باعوا الحديد !!
وأنت مطننش وفكرك بليد !!
.. كأنك مفيش !!
***
دوشتوا دماغنا " بجمال " طلعتك ومن يومها وإحنا عَبـيد حضرتك
ما تزعلش إني مواطن أبيح ورافض كلابك فـ شعبك تطيح
فسادهم يا ريِّس واضح صريح قوم بينا صلّح وفتَّش .. وثور
ح نكتب تاريخك ياريِّس بنور مش تبقى عايش كأنـَّك مفيش !!
***
ورحمة أبوك مادام أنت قاعد عيب لمَّا عُصبة نَـوَر يسحبُوك
م تُقبض عليهم .. م تقطع إيديهم م تعمل عليهم يا ريِّس شاويش
بدل م انت ساكت وقاعد مفيش!!
***
ياريس علىّ الطلاق تعبانين !! يا ريس علىّ الحرام كفرانين !!
صبرنا سنين سيادتك مسلطن وشعبك وناسك بتآكل مسرطن
وتشرب مجاري وميت سم هاري .. وهما غلابة ومش دريانين !!
ما تنهض يا ريس تلم الديابه ؟!! ده شعبك غلابة ومليان طيابه ..
وهوَّ الشفاعة ف يوم الحساب وهما البطانة الحثالة الكلاب
ما يملاش عنيهم غير التراب وليهم ضوافر وميت ألف ناب
وواقفين لشعبك ورا كل باب لإمتى ح تسكت وليه الغياب ؟
ده ياما ممالك طواها التراب حياتنا ياريس تعب فوق عذاب
***
يا ريس " شريفك " ماهوَّاش شريف !! " نظيفك " يا ريس ماهوَّاش نظيف !!
وحتى " حبيبك " ماهواش حبـيب !!
وأنا غصب عني خلاص إستويت بـغـُلبي إنحنيت

وطلعان عنيا وصعبان عليا بحسبة بسيطة ومن غير خريطه ..

وكونك مفيش .. لقيت متساويش ومش فارقه كوني اموت او أعيش ..
***
نويت أشتكيك للِّي فوقي وفوقك وأصلي الفرايض ..عسى يفـُك طُوقـك
قالولي إللي يسجد عدو النظام !!
حاولت أحكي حالي ..!! قالولي الحكاوي نميمة وحرام !!
فكرت أكتب .. لقيتكم سيادتك منعتوا الكلام !!
فقررت أحلم .. هاحلم سيادتك وأفُك اللِّجام
ولو مش هيعجب سيادتك يا فندم وصِّي العساكر .. تاخُدني أمَّا انام !!
***
حلمت إني شعب ومصلوب بطولي على أرض سمرا
ودمي بينـزف ومليان جروح وفوق صدري جمرة
يميني مربّط على أرض طابا شمالي ممسمر فـ "أولاد علي"
ورجلي على جزع نخلة فـ "حلايب" ومرتاح براسي على حِجْر مصر
وشوفتك ياريس ...كأنك نبي ... فـ إيدك عصاية وليك معجزات
وشايل صليبي وبتفـُكني .. وانا فـ جنَّه خضره .. وتحتي جداول ..
ومن فوقي نور .. وريحة بخور ..
همست ف ودانك بآخر وصيّة
إنسى إللي فاتك .. هننسى الأسية .. !! أمانه عليك ..
حُط الوطن جُوَّه نِنِّي عينيك كرامة عيالنا أمانة ف إيديك
بحق إللي بينّا يا ريِّس وبـينك وحَق اليَمِين و" ألكتاب " فى يمينك
بحق الشهيد .. إللي رافع جبينك
وجيش إنتصارك فى يوم العبور وجيل حُر طالع .. وعدته بدور
لملم عيالك .. وجمَّع فـ مالك
وإسحب " جمالك " وسيبنا وغور

[ندعوك للتسجيل في المنتدى أو التعريف بنفسك لمعاينة هذه الصورة]

اهو سبكم وغار وربنا يعوض عليكم
كلام واقعى يعطيه الصحة هالاحمد فؤاد
وكمان انت بسوطة على جيبتك للموضوع
8842

كمان هات كتير لاحمد فؤاد نجم عشان انا بحبه bravo

رحلت ورحل عدلها
وثقت من الهموم مراكب
راح السبع يطلب عدلها
لقى القرد على الكرسى راكب

الحمد لله على العافية بعد السقم

شكرا ليكى يامــــــــــــــلاك على ردودك وتعليقاتك الرائعــــــــــــه

بســـــــــــوطه

[ندعوك للتسجيل في المنتدى أو التعريف بنفسك لمعاينة هذه الصورة]

شـــــــــــكرا ياســـــلطان الغرام

وانت تــــــأمر ياباشــــــــــــــا
وقصائد احمد فؤاد نجم ححاول اجيبهالك

بســــــــوطه

[ندعوك للتسجيل في المنتدى أو التعريف بنفسك لمعاينة هذه الصورة]

» قصيدة للشاعر الكبير أحمد فؤاد نجم ممنوعة من النشر
» قصيده فى عيد ميلاد الرئيس --- أحمد فؤاد نجم
» جديدة في المنتدى مفيش ترحيب و لا ايه
» كأنك تقراء المصحف وهو بين يديك
» كأنك تحجّ ... بالصور الحركية